MAALIM SEIF AHIMIZA VIONGOZI KUPUNGUZA UMASIKINI 

Makamu wa kwanza wa Rais wa Zanzibar Maalim Seif Shariff Hamad amesema Tanzania inakabiliwa na changamoto kubwa za kutokomeza umasikini kutokana na baadhi ya viongozi wa serikali kuendekeza ufisadi wenye maslahi binafsi badala ya wananchi.

Ametoa kauli hiyo wakati akiweka jiwe la msingi kwa ajili ya ujenzi wa ofisi za makao makuu ya Chama Cha Wananchi-CUF Wilaya ya Kinondoni Mkoa wa Dar es Salaam.

Maalim Seif ambaye pia ni Katibu Mkuu wa CUF anatoa kauli hiyo ikiwa ni siku chache tu baada ya Rais wa Jamhuri ya Muungano wa Tanzania Jakaya Kikwete kufanya mabadiliko katika Baraza la Mawaziri kufuatia baadhi wa mawaziri kuhusishwa na tuhuma za ubadhirifu wa fedha za umma.

Amesema licha ya Tanzania kuwa na rasilimali za kutosha lakini bado wananchi wake hawanufaiki nazo kutokana na tamaa ya baadhi ya viongozi wake.

Amesema wakati nchi ikiwa imetimiza miaka 50 ya uhuru bado suala la ufisadi limekuwa changamoto kubwa hali inayodidimiza uchumi wa Taifa na kusababisha Mfumuko wa bei za bidhaa kwa watanzania.

Ujenzi wa ofisi hizo unakadiriwa kutumia Sh milioni 13 tu mpaka kukamilika kwake ambapo Naibu Katibu Mkuu wa chama hicho Tanzania Bara Julius Mtatiro anasema hatua hiyo ya uzenzi wa gharama nafuu unaonyesha jinsi chama hicho kinavyopingana na ufisadi.

Akisoma Taarifa ya ujenzi wa ofisi hiyo Kaimu Katibu wa CUF Wilaya ya Kinondoni Kassim Hamis  amesema hadi sasa zimekwisha tumika Sh milioni tatu na sabini na sita elfu licha ya juhudi hizo kufanyika lakini kumekuwepo na makundi ndani ya chama hicho yanakwamisha maendeleo. 

Suala la ufisadi,uwajibikaji na utawala bora limekuwa likijadiliwa sana katika kipindi cha miaka ya hivi karibuni na hasa tangu baada ya kuibuka kwa kashfa ya Richmond hadi sasa.

Mwisho.